PPOC Comval Giila ang Kabatan-onan isip Kabahin sa Hisgutanang Pangkalinaw

MACO, CVP - Mapasalamaton karon ang Youth for Peace Movement Compostela Valley o YFPM Comval sa pag endorso niini isip kabahin sa Provincial Peace and Order Council (PPOC) sa Comval.

Nahimo ang maong lakang pinaagi sa unang Joint PPOC and Provincial Disaster Risk Reduction and Management Council (PDRRMC) Meeting sa maong Probinsya karong tuiga, nga gipahitabo sa Social Hall Capitol Building, Nabunturan, Compostela Valley Province niadtong July 17, 2019.

Bag-o niini, una nang gisugyot atong milabay nga tuig sa Chairman sa PPOC Comval na si Gov. Jayvee Tyron Uy ang iyang kagustuhan na himong miyembro ang YFPM Comval sa konseho, isip pag ila sa tingog sa mga kabatan-onan sa hisgutanang pangkalinaw. Suportado usab kini ni Provincial Director Noel Duarte sa DILG Comval.

Gi-representahan ni Hon. Roland Año, ang kasamtanang Bise-President sa YFPM Comval ang maong miting, nga mi misaksi usab sa pag endorso sa organisasyon.

"Dako nga pangandoy sa kabatan-onan sa Comval ang mahatagan mi ug tingog sa hisgutanan pangkalinaw. Ug karon nga mahimo na mi na parte sa PPOC, dili namo pakyason ang among sector sa pag representa sa ila," sugyot ni Hon. Año.

Sa kasamtangan, ginahulat na lang ang pag apruba sa Resolusyon na maoy magdeklara sa kabatan-unang pundok isip regular na miyembro sa konseho.

Gitambungan usab ang unang PPOC ug PDRRMC Meeting sa mga miyembro niini sama ni Hon. Maria Carmen S. Zamora, Vice-Chairperson og bag-ong Bise Gobernador sa Probinsya; Deputy Regional Director sa NICA XI na si RD Hernie Mabalo; Provincial Director sa DILG Comval na si PD Noel Duarte; Schools Division Superintendent Dr. Rey Almodiel Solitario sa DepEd Comval; Dr. Joseph Randy Luy, Head sa Comval PDRRMO; ug mga representante sa AFP, PNP, ug BFP sa Comval.

Written by: Peace Communication Committee, Youth for Peace Movement Comval